بسم الله الرحمن الرحيم
السلام عليكم ورحمة الله وبركاته
النجاح مطلب الجميع وتحقيق النجاح الدراسي يعتبر من اولويات الاهداف لدى الطالب ولكل نجاح مفتاح وفلسفة وخطوات ينبغي الاهتمام بها ..النجاح فكرا يبدأ وشعورا يدفع وعملا وصبرا يترجم وهو في الأخير رحلة.
وهناك أمور تؤدي إلى النجاح منها :
1- أن يكون الهدف محدد كي لايضيع الجهد .
2- رسم خطة زمنية للوصول إلى الهدف.
3- وضع مراجع للوصول إلى الهدف.
4- الاستفادة من ناس سبق ان حققوا أهداف تتماشى مع اهداف النجاح وكسب الخبرة منهم.
ويسعدنا ذكر بعض الاعضاء الذين ابلوا حسنا ..
ومنهم خريجي الجامعة ، وخريجي الثانوية العامة :
أول من التقينا كان المبدع:معاذ وليد عياش
كما اجرينا معه حوار بسيط :
* كيف تصف شعورك بعد تذوق طعم النجاح والتخرج من المرحلة الثانوية / الجامعة ؟
شعور روعه ما اتوقع انه في فرحه اكبر من فرحة التخرج.
ماهو تخصصك الجامعي أو المدرسة الذي تخرجت منها ؟
نظم معلومات ومكتبات
Information technology and library science
• كيف تنظم وقتك و تعمل جدول للمذاكرة ؟
لووول ليلة الامتحان امسك الكتاب .
• كيف تحبب إلى نفسك المذاكرة و تستمتع بها ؟
ما استمتع بالدراسه ولا عمري حاولت احبب نفسي بالدراسه .. ومجبور ادرس عشان مستقبلي .
• كيف تستعد للامتحان ؟ بلا توتر و قلق
بلا توتر وقلق ما يصير .. بس احاول اقرى الادعيه بعد الدراسه واخلص دراسه قبل ما اروح الجامعه .. ومستحيل امسك الكتاب قبل الامتحان بساعه ..
• الحالة النفسية شلون دورها في فترة الامتحانات ؟
طبعا الحاله النفسية تأثر وااااااااااااااايد .. سواء بوقت الدراسه او بيوم الامتحان ..
واهم شي البعد عن التوتر والهواش << ولو انه في هالفتره الواحد يتهاوش مع ذبان ويهه من العصبيه والتوتر خخخ
هل ساعدك منتدى روح العشاق في دراستك ؟ كيف ؟
بصراحه يمكن المنتدى نفسه ما ساعدني .. بس في اعضاء موجودين فيه ساعدوني .. وما انسى دعاهم لي ووقفتهم معاي ..
نصيحتك / نصيحتكِ لطلاب المدرسة ؟
الدراسه يبيلها صبر .. بس صدقوني مافي احلى من فرحة التخرج شعور يخلي الانسان طاير بالسما .
ما هي خطط المستقبل باذن الله تعالى ؟
خططي المستقبليه هو اني اقدم اوراقي وادور لي على وظيفه .
--------------------------------------------------------------------------------
كما أسعدنا :داوود عبدالفتاح عياش
واليكم المقابلة معه :
* كيف تصف شعورك بعد تذوق طعم النجاح والتخرج من المرحلة الثانوية / الجامعة ؟
والله هو اكيد بيكون شعور جميل واحساس بالفرح
ولكن طبعا لازم انكون حاطين في بالنا ان لحين احنا ماخلصنا كل شي
انما خلصنا اول واهم جزء من حياتنا العلميه والعمليه
لان لحين ورانا دراسه للي بيكمل دراسه او شغل وكرف
فبعد هالنجاح يبدا الجد فالحياه
ماهو تخصصك الجامعي أو المدرسة الذي تخرجت منها ؟
علمي
• كيف تنظم وقتك و تعمل جدول للمذاكرة ؟
احم .. سؤال محرج .. قبل الامتحان ادرس
• كيف تحبب إلى نفسك المذاكرة و تستمتع بها ؟
امممم .. قبل لا ادرس اكون مسوي شي يخليني مستانس
وفي نفس الوقت احط في بالي اني في مرحله حاسمه
فـ أروح ادرس واحاول اطلع كل القدرات اللي عندي
من حل مسائل وحفظ وفهم ... الخ
• كيف تستعد للامتحان ؟ بلا توتر و قلق
امممم .. بالدراسه السليمه واللي تضمن بها انك اتجيب الدرجه الممتازه
ولكن اقلق والتوتر في حاله وحده يوم اكون متضايق وماعرف ادرس
• الحالة النفسية شلون دورها في فترة الامتحانات ؟
لها درو كبير في فترة الامتحانات
مثلا انا عن نفسي في كل الامتحانات كنت ادرس ونفسيتي مرتاحه
الا فامتحان الفيزيا واللي نزلت درجتي فيه وايد
قبل الامتحان بيوم ماقدرت ادرس عدل لان كنت متضايق من سالفه
واشغلت بالي هالسالفه ونفسيتي ماكانت تمام فدخلت الامتحان وانا متوتر وخربطت فالامتحان واخر شي درجتي انزلت وااايد
هل ساعدك منتدى لو قطر في دراستك ؟ كيف ؟
امممم .. تقدر اتقول .. الاعضاء كانوا يرفعون معنوياتي للدراسه
نصيحتك / نصيحتكِ لطلاب المدرسة ؟
الدراسه اول باول واللي مب متعود يدرس اول باول يحاول
بس يحاول يدرس اول باول بس مب من اول شي يضغط ويحك حك
لا يبدا السنه الدراسيه بدراسه خفيفه عشان ينشط الفكر عنده
وشوي شوي اتزيد الجرعه الدراسيه ولاتدرس اكثر من 3 ساعات باليوم
بالذات اذا كنت ترجع من المدرسه متاخر
واخر شي اللي فثالث .. شدوا حيلكم وتذكروا ان هالمرحله مرحلة حسم
وهي اللي بتقودكم مابعد الثانويه اما لفوووق او تحت
والله يوفقكم يارب
ما هي خطط المستقبل باذن الله تعالى ؟
صراحه.. لحين الفكره مشوشه عندي ومب عارف شاتخصص
بس بقدم على اكثر من مكان وبفكر فالتخصصات الموجوده
--------------------------------------------------------------------------------
كما اسعدنا ايضا معتصم محمد عياش
ونخليكم مع اجوبته على الاسئلة
* كيف تصف شعورك بعد تذوق طعم النجاح والتخرج من المرحلة الثانوية ؟
الصراحه فرحت من كل قلبي وفرحت لما شفت امي وابوي يباركولي ويهننوني
مثل ماقالت الفنانه احلام ,, فرحنا من قبل لكن الفرحه هذي غير
ماهو تخصصك الجامعي أو المدرسة الذي تخرجت منها ؟
ثانويه عامه ادبي رياضيات
• كيف تنظم وقتك و تعمل جدول للمذاكرة ؟
اممم يعني كل واحد وجدوله ..
بس انا مسكت الكتاب من الصبح لين الليل خخخ
• كيف تحبب إلى نفسك المذاكرة و تستمتع بها ؟
تشجيع امي وابوي
• كيف تستعد للامتحان ؟ بلا توتر و قلق
اتوكل على الله ..
• الحالة النفسية شلون دورها في فترة الامتحانات ؟
اففف الحاله النفسيه داااقه ,, بس لما انشوف الربع وانسلم عليهم يروح التوتر
هل ساعدك في دراستك ؟ كيف ؟
اي نعم ,, تشجيع الاعضاء لي
نصيحتك / نصيحتكِ لطلاب المدرسة ؟
شدوا الهمه وخصوصاً طلاب التوجيهي لانها اخر سنه
والله يوفقكم
ما هي خطط المستقبل باذن الله تعالى ؟
ان شاء الله ندخل مؤسسه البترول اللي عن طريقها ندخل ان شاء الله الجسر الاكاديمي وبعدها الله كريم
وان شاء الله تخصصي بيكون اداره واعمال / محاسبه .
--------------------------------------------------------------------------------
الرئيسية 
أحدث الصور 
السبت أغسطس 23, 2008 9:01 am